O Teatro Principal acolleu hoxe o evento “Transformando a cidade dende o cooperativismo”, impulsado pola Concellaría de Promoción Económica e a Unión de Cooperativas Espazocoop con motivo do Ano Internacional das Cooperativas.
A alcaldesa, Goretti Sanmartín, e a tenenta de alcaldesa, María Rozas, interviron no acto para confirmar o compromiso do Concello de Santiago “cun modelo económico máis xusto, igualitario e transformador, que debe axudar a construír un mundo mellor”.
A concelleira de Promoción Económica, María Rozas, visitou este mércores a tenda de cosmética natural Maravalla, que colabora co Refuxio de Bando, no marco da segunda edición da campaña “12 Comercios, 12 Sensibilidades”.
Trátase dunha iniciativa na que participan unha ducia de comerciantes de Santiago para darlle visibilidade a outras tantas entidades solidarias. O programa conta coa colaboración da Concellaría de Dereitos e Servizos Sociais, Promoción Económica e Xuventude.
A Feira de Outono das Emprendedoras de Compostela celebra a súa sétima edición na vindeira semana, co obxectivo de repensar a economía desde unha nova perspectiva que pon o foco na saúde e no benestar das persoas. A xornada organizada polo Concello, a través do departamento de Promoción Económica, e a Universidade de Santiago, desenvolveráse o próximo 26 de setembro na facultade de Química.
A VII Feira de Outono das Emprendedoras de Compostela explorará como construír un modelo económico sostible, que xire arredor dunha vida saudable e poña no centro ás persoas e a súa calidade de vida
O Concello de Santiago, a través do departamento de Promoción Económica, e a Unión de Cooperativas EspazoCoop reflexionarán sobre o poder transformador do cooperativismo e a economía social, nunha xornada que se vai celebrar o próximo mércores, 24 de setembro, no Teatro Principal. Baixo o lema “Transformando a cidade dende o cooperativismo”, o evento comezará coa representación da obra “As que limpan”, da compañía A Panadaría. As entradas xa se poden retirar na Zona C, na praza de Cervantes.
A alcaldesa, Goretti Sanmartín, e a tenenta de alcaldesa, María Rozas, reivindicaron hoxe o valor cultural e social da artesanía e confirmaron a aposta do Concello de Santiago pola recuperación dos oficios tradicionais no marco da diversificación económica de Compostela.
Foi na inauguración do mercado “Artesanamente”, que se celebra ata o domingo con expositores de medio cento de marcas, exhibicións ao vivo, e numerosas actividades paralelas.
O Pleno da Corporación municipal debatirá o xoves desta semana, na súa sesión ordinaria, un expediente ‘paraugas’ que unifica as regras de cobro (homoxeniza os prazos, por exemplo) e modifica varias ordenanzas coma a do IBI e do ICIO. Unhas das novidades reside nas bonificacións para as vivendas de promoción pública no IBI e no ICIO, mentres que se gravará máis os inmobles desocupados que permanezan nesa condición durante dous ou máis anos e cuxa propiedade sexa titular de catro ou máis inmobles.
A alcaldesa de Santiago de Compostela, Goretti Sanmartín, encabezou este venres o minuto de silencio en sinal de solidariedade co pobo palestino que, canda membros da corporación, persoal do Concello e veciñanza se gardou na Praza do Obradoiro. A capital galega sumouse á convocatoria da Federación Galega de Municipios e Provincias (Fegamp) para expresar a súa condena polo masacre e esixir ao goberno israelí que deixe inmediatamente de cometer actos prohibidos na Convención sobre o Xenocidio contra a poboación palestina de Gaza.
A alcaldesa compostelá reclamou "que remate dunha vez o xenocidio do pobo palestino" e se poña fin ao exterminio da poboación de Gaza pola falta dos recursos básicos para poder subsistir. Nese sentido, considerou fundamental que "ninguén se poña de perfil" e desexou que actos coma o deste venres sexan un clamor co que os concellos galegos se manifesten con rotunidade. "O que está pasando el Palestina está cuestionando a propia humanidade. Esperemos que dunha vez por todas a comunidade internacional diga alto e claro ao estado de Israel que hai que facer un alto o fogo imediato", concluíu.
Santiago acollerá nos días 19, 20 e 21 de setembro “Artesanamente”, unha iniciativa que reunirá a preto de medio cento de marcas de artesanía de diferentes disciplinas, incluida a artesanía alimentaria. O mercado, que conta co apoio do departamento municipal de Comercio, vai acompañado dunha ampla programación paralela, con exhibicións de artesáns traballando en directo, faladoiros e conferencias.
A concelleira de Dereitos e Servizos Sociais, Promoción Económica e Xuventude, María Rozas; presentou “Artesanamente” nunha rolda de prensa na que participaron o director do mercado, Manuel Moledo, de Aquelando Eventos; Carmen Pita, directora de Promoción de Turismo de Galicia; Ricardo Rivas, xefe da área de Calidade Alimentaria a Axencia Galega de Calidade Alimentaria; e Laura Fontenla, subdirectora xeral de Artesanía, Entidades e Promoción Comercial.
O departamento municipal de Promoción Económica pon en marcha un novo ciclo de actividades formativas dirixidas a empresas e profesionais co obxectivo de mellorar o tecido empresarial de Santiago. Serán máis de medio cento de cursos e preto de 500 horas de formación, tanto presencial como telemática, e totalmente de balde. As actividades comezarán o próximo día 23, e o prazo de inscrición xa está aberto.
O Concello de Santiago incentivará a contratación do alumnado traballador do obradoiro dual de emprego “Parque Forestal do Monte Pedroso” unha vez finalice a súa formación. Farao cunha convocatoria de subvencións á que destina un total de 30.000 euros, e ás que poden optar persoas empregadoras e empresas que contraten a xornada completa e por un mínimo de tres meses aos alumnos e alumnas que recibiron formación nas especialidades de “repoboación forestal e tratamentos silvícolas” e “confección e publicación de páxinas web”.